Laing sinkhole nakit-an sa Dalaguete

CEBU, Philippines - Human didto sa lungsod sa Dumanjug ug Ginatilan, laing sinkhole ang nadiskobrehan ug ning higayuna nahimutang kini sa sitio Dakung Balas ug Sityo Cacarpo barangay Casay sa lungsod sa Dalaguete ug nadiskobrehan kini kagahapong adlawa (Huwebes).

Si PO3 Cristopher Requina sa Dalaguete Police Station dihang nahinabi sa Banat News mibutyag nga gisusi sa grupo ni PO1 Cristopher Romarate ug mga kaubanan kagahapon sa alas 7:35 sa buntag ang lugar.

Ang barangay kapitan sa maong dapit nga si Joseph Belamia dihang nahinabi sa Banat News mibutyag nga ang maong sinkhole niadto pang petsa 8 sa buntag ning bulana nila nadiskitahe.

Apan nataligam-an lang tungod sa nagsingabot nga kapistahan sa lungsod adtong higayuna ug kagahapon natribukar og balik tungod kay padayong nagkadaku ang pagkalungag sa yuta ug nagkadaghang mga punoan sa saging ang gilamoy ngadto sa ilawom.

Matud ni Belamia nga duha ka adlaw human sa 6.9 magnitude nga linog ang manugwayay og hayopan maoy unang nakadiskubre niini human giingong kalit nga niunlod ilawom sa yuta ang dili muminos 30 ka punoan sa saging sa maong lugar.

Nabantayan palibot sa maong dapit ang mga liki sa yuta hinungdan nga kini gibutangan na og signage nga nagdili sa mga tawo sa pag-agi sa maong lugar ug gibutangan og babag palibot niini.

Sumala pa ni Belamia gimandoan na ni Mayor Allan Ronald Sesante ang municipal engineer pagsusi sa maong lugar.

Duna na say mga bag-ong mga punoan sa saging ang naunlod. Gipaabot pa sa mga molupyo nga adunay geologist nga personal nga mosusi sa dapit.

Niadtong nanglabay’ng mga adlaw usa ka sinkhole ang nakit-an diha sa barangay Camboang lungsod sa Dumanjug, laing sinkhole ang nakit-an sa Ginatilan ug dunay nanggawas nga nagbukal nga tubig sa baybayon sa lungsod sa Dumanjug.

Ang maong mga talagsaong nasinating paglihok sa yuta dinhi sa Sugbu nagsugod pipila ka semana human sa pagtay-og sa 6.9 magnitude nga linog nga nasentro sa Negros Occidental. (/EIM) (BANATNEWS)