CEBU, Philippines - Usa ka 60-anyos nga lola ang napalgan ug gituohang gipatay sulod sa iyang lawak tungod kay kini gibinaklid na ang mga kamot nga gibaatan sa bra, samtang ang baba gitaptapan sa stockings ug ingon man ang duha ka tiil niini nga gibaatan og RCA cord diha sa ilang balay sa PBN Housing Project, Nivel Hills sa barangay Busay ning dakbayan sa Sugbu.
Si Antonietta Espiritu Garlito,60, usa ka retiradong teller sa Government Service Insurance System (GSIS) ug residente sa maong lugar ang napalgan nga wala nay kinabuhi alas 5:25 kagahapon sayo sa buntag sa iyang katabang nga si Mary Rotchie Himalaya Lumagdang, 42. Sa imbestigasyon sa Homicide Section sa Cebu City Police Office (CCPO) nasutang ang pultahan sa biktima naabli na ug pawong ang suga sa sulod.
Nasuta sa kapolisan nga sirado ang unang pultahan sa balay apan wala kini ma-lock ug abli usab ang window glass niini.
Usa ka itom nga shades ang nakit-an sa balay ug gisubay pa ang duha ka cellphone ug mga alahas sa biktima.
Si Sr. Insp. Jul Mohammad Jamiri, hepe sa Homicide Section nagkanayon nga posibleng kaila ra sa biktima ang killer.
Walay nakitang samad sa lawas niini og gituohang wala kini makaginhawa tungod sa baat sa baba sa biktima.
Si Garlito buwag sa unang banang si retired police Sr. Insp. Julio Eder human ma- annulled ang ilang kaminyuon, naminyo pag-usab ni Benjamin Espiritu apan gikatakda na usab nga ma-annul ang ilang kasal ug nag-ungot pa ang kaso.
Si Sr. Supt. Melvin Ramon Buenafe, hepe sa CCPO nagkanayon sa mga tigbalita nga iyang ipatawag ang mga kabanay ingon man ang bana sa biktima. (BANATNEWS)