Pari nga wa momisa gireklamo

CEBU, Philippines - Mireklamo ang mga kabanay sa 11 anyos nga batang namatay tungod kay wala dayon ka-misahe   sa kura paroko sa simbahan sa lungsod sa San Fernando nga nakalangay sa lubong kagahapon.

Ang kabanay ni Ivy Mae Cabaral,11, usa ka special child nga taga barangay Panadtaran, San Fernando kinsa namatay niadtong Huwebes tungod sa komplikasyon sa tonsel mireklamo   kay ang gitakdang santos nga misa sa ala 1:00 sa hapon nahimo nang alas 2:00 pasado sa hapon.

Sila si Floretis ug Junior Cabaral nga mga ginikanan sa namatay nagbagulbol  tungod kay mga alas 12:30 pa sa udto sila miabot sa simbahan uban ang ilang mga paryente ug silingan aron pamisahan ang haya sa ilang anak.

Apan wala sila masayod unsay nalangayan sa pari sa maong lungsod nga wala man dayon kini maka-misa.

Ilang gipadangat ang ilang reklamo ngadto kang kapitan Ricardo Reluya sa barangay Panadtaran kinsa mipabuhagay usab niini ngadto sa Bantay Radyo.

Gibutyag ni kapitan Reluya atol sa interview sa Bantay Radyo nga nakabutang sa resibo sa mga kabanay ang pagbayad niini sa ilang pamisa sa minatay sa ala 1:00 sa hapon ang schedule apan miabot nalang ang alas 2:00 sa hapon wala ablihi sa pari ang simbahan    ug namug-aw sila     og paabot sa gawas sa simbahan nga nag-antos sa hilabihang kainit sa adlaw.

Ang mga tinugyanan sa simbahan nga gipangutana sa mga kabanay sa minatay miingon nga mipahuway pa si Msgr. Antonio Quintana ang   pari sa maong lungsod kay gikapuyan busa wala dayon kini makamisa .

Samtang gipadayag sa usa ka Mrs. Vargas kinsa maoy parish secretary sa maong simbahan sa Banat News  nga alas 2:00 gyud sa hapon ang schedule sa maong misa.

Dugang pa niya nga niadtong Lunes pa nagpa-book ang mga kabanay sa minatay kinsa gusto gyud unta nga sa ala 1:00   sa hapon pamisahan ang ilang minatay apan ila kining gibalibaran tungod kay nagpakompisal pa si Msgr. Quintana sa mga tinun-an sa publikong tunghaan sa maong oras.

Samtang bahin sa giingong wala dayon sila ablihi sa simbahan gitubag usab kini ni Mrs. Vargas nga gibalaod na gayud sa simbahan nga kun walay misa dili usab kini ablihan aron walay makasulod nga kawatan.

May higayon kuno nga gihurot og kawat ang mga wire sa suga sa simbahan busa wala silay suga sulod sa pipila ka adlaw   kay bisan wala’y misa giablihan man ang simbahan, matud pa ni Vargas.

Midugang siya nga ang yawe gidala usab sa ilang sacristan mayor nga mikuyog   sa Monsenyor nga nagpakompisal sa mga tinun-an.

Gihimakak usab niya nga nabuwad  sa init ang mga kabanay sa minatay tungod kay aduna may mga dagkong punoan sa nangka sa gawas sa simbahan nga ilang gipasilungan.

Hangtud alas 2:00 kagahapon sa hapon dihang gisusi ning tigbalita wala pa makasugod ang santos nga misa ug nahuman ang lubong niana nang pagkahapon.