CEBU, Philippines - Pormal na nga gisubhan ni Governor Gwendolyn Garcia ang P1.9 milyones nga heritage park project sa probinsiya sa Sugbo didto sa Lungsod sa Alegria.
Uban sa gobernador sa pag-inugurar sa maong heritage park sa Alegria mao sila si Vice Governor Agnes Magpale, 2nd district board member Peter John Calderon, Alegria Mayor Emelita Guisadio, Father Felomino Jonjie Ybanez, mga mayor sa silingang lungsod ug uban pang mga lokal nga opisyal.
Matud pa ni Mayor Emelita Guisadio ug Vice Governor Magpale nga ang nahisgutang proyekto usa ka maayong gasa sa probinsiya ubos sa pagpangulo ni Gobernador Garcia alang sa mga taga Alegria.
Sama ni Mayor Guisadio, si Governor Garcia nanghinaut usab nga ampingan pag-ayo ang maong proyekto sa mga taga Alegria busa iyang gipangayo ang panaad ug panumpa sa mga molupyo sa maong lungsod ang kinasing-kasing nga pagmahal sa maong proyekto.
Nasayran nga ang nahisgutang parke usa ka ehemplo sa pagtinabangay sa gobernador ug sa Simbahan sanglit ang luna nga gitarokan sa parke gipanag-iya man sa Saint Francis Xavier Parish sa nahisgutang lungsod ug ang kagamhanan sa lalawigan maoy migasto sa pagpatahom niini
Gani atol sa inugurasyon gipirmahan ang usa ka Memorandum of Agreement tali sa mga opisyales sa lalawigan sa Sugbo, lungsod sa Alegria ug kura paruko sa Saint Francis Xavier Parish. - BANAT NEWS