Lopez naglagot bahin sa ilang miting

CEBU, Philippines - Si Kapitan Dominggo Lopez sa barangay Tinago, ning dakbayan sa Sugbo wala motambong sa miting sa Association of Barangay Councils (ABC) kagahapon tungod kay didto kini ipahigayon sa buhatan ni Vice Mayor Joy Agustus Young.

Mao kini gibutyag ni Lopez ngadto kang Mayor Michael Rama tungod kay wala siya makauyon sa maong pamaagi. Gikahibulong ni Lopez kung nganong sa buhatan man ni Young ipahigayon ang ilang tigom nga aduna man unta silay opisina sa ABC sa South Road Properties (SRP).

Nanghinaut si Lopez nga dili unta sagolan og pamolitika ang ABC ug kinahanglan nga ang ilang hisgotan mao ang bahin sa ilang trabaho ug dili kay pamolitika.

Dugang pa niya nga iyang nabantayan nga adunay imbitahon nga mga politiko sa ilang mga assembly ug kanunay kini mangatake sa mayor nga maoy butang nga wala niya mauyoni, matud pa ni Lopez.

Samtang si Young midepensa sa giingong panagtagbo kagahapon sa iyang buhatan ug iyang giklaro nga wala siya’y labot sa maong miting kay igo rang gigamit ang iyang conference room.

Sumala pa sa bise mayor nga bisan kinsa nga grupo makahimo ra sa paggamit sa iyang conference room.

Nagkanayon si Young nga dili na unta angayang modangop si Lopez ngadto sa mayor ug kung aduna kini yangungo, kinahanglan nga adto moderetso kang Rallota.

Nasayran nga nagkabangi karon sila si Rama ug Young gumikan sa tagsa-tagsa nila ka mga baruganan. Ingon usab niini ang kahimtang sa mga kapitan sa barangay diin adunay dapig sa mayor ug may dapig usab kang kanhi Mayor Tomas Osmeña ug sa mga konsehal nga sakop sa kampo niini.  - BANAT NEWS