CEBU, Philippines - Ang drayber nga nakaligis patay sa 3 anyos nga bata kinsa misulay sa pagsibat, mitahan sa kapolisan sa traffic division sa Mandaue City Police Office (MCPO) niadtong miaging hapon ug kasamtangang nagtingkagol sa prisohan.
Si SPO4 Eleasar Saromines, imbestigador sa traffic division sa MCPO nga nahinabi sa Banat News miila sa suspetsado nga mao si Joel Inso Initan, hingkod, minyo, nga lumad nga taga barangay Tindog sa lungsod sa Medellin ug drayber sa pribadong sakyanan nga gipanag-iya sa usa ka Korean national.
Samtang ang iyang naligsan patay mao si Chassidely Sayne Lumontad, taga sitio Cabancalan sa baranay Banawa, dakbayan sa Sugbo.
Matud pa ni SPO4 Saromines nga kuyog sa iyang apohan ang biktima nga namaligya og mga ornamental plant sa nahisgotang lugar dihang naligsan kini sa awto nga Honda nga gimaneho ni Initan.
Dugang pa ni Saromines nga human sa maong hitabo dali nga gikarga ni Initan ang biktima sa gimaneho niining sakyanan ug kuyog sa apohan paingon ngadto sa Perpetual Soccour Hospital sa dakbayan sa Sugbo. Gikan didto mibiya dayon ang suspetsado ug wala na kini mobalik sa maong tambalanan.
Matud pa ni Saromines nga maayo nalang nga boluntaryo kining mitahan sa iyang kaugalingon. Gipasaka na ang kaso batok sa maong drayber. - BANAT NEWS