Katabang napaig sa sunog

CEBU, Philippines - Usa ka katabang ang napaig samtang laing katabang ang missing human masunog ang balay sa ilang agalon didto sa Holy Family Village 1 sa barangay Banilad, ning dakbayan sa Sugbo kagahapon sa kaadlawon

Ang biktima nailhan nga si Cornelia Tagalog, hingkod nga lumad nga taga Mindanao, samtang ang laing katabang nga si Aubrey Soria, 22, dalaga nga taga Dumlog, dakbayan sa Talisay maoy gideklarar nga missing. 

Si Cebu City Fire marshall Sr. Supt. Aderson Comar mibutyag nga ilang nadawat ang alarma sa sunog alas 2:06 kagahapon sa kaadlawon ug paglabay sa 3 minutos hingpit nilang nakontrolar ang kayo nga gipaubos lang sa first alarm.

Sa pasiunang imbestigasyon sa kabomberohan   nasayran nga ang balay nga nasunog gipanag-iya ni Retired Col. Mariano Falcon,Sr.,78 diin siya nagpuyo uban sa iyang asawa, anak, umagad, mga apo ug mga katabang. Ang mga sakop sa Homicide Section sa Cebu City Police Office (CCPO) nga miresponde sa maong alarma nasayod nga adunay napaig nga katabang.

Sa pasiunang imbestigasyon nila ni SPO4 Rey Cuyos, SPO1 Ruth Violango ug PO3 Wetzell Berry ilang nasuta nga si Tagalog napalgan nalang nga nagkaob sa ground floor sa balay nga naugdaw na   ug   mikupos na ang lawas niini.

Dugay nailhan ang patay’ng lawas ni Tagalog sanglit kay nagduha-duha sila kun di ba kaha kini si Soria kinsa nawagtang usab sa maong higayon.

Si Soria gidawat sa pamilyang Falcon isip katabang niadtong Lunes

Si Mariano  Falcon Jr., anak ni Falcon Sr. nga nahinabi sa mga tigbalita nagkanayon nga nakamata sila dihang misugod na pagsulod ang aso sa ilang kuwarto sa ikaduhang andana sa ilang balay.

Daling nanganaog ang iyang asawa ug tulo ka anak agi sa fire exit paingon sa ilang atop samtang mikuha siya sa fire extinguisher nga giubanan niya og singgit nga sunog kay wala na niya mapukaw ang duha nila ka katabang ug labaw sa tanan wala usab niya kini makita nga nanggawas kini sa ilang kuwarto. Apan gumikan sa kakusog sa kayo wala na gyud kini matabang pa sa extinguisher. 

Ang balay nga naugdaw gipuy-an sa 12 ka tawo gikan sa mga ginikanan, mga anak , mga apo, ug duha ka mga katabang babaye ug tulo ka trabahanteng lalaki.

Atol sa sunog, adunay nakakita sa usa ka babaye nga miambak sa koral nga nagdala og bag nga itom. Nagduda ang kapolisan ingon man ang mga sakop sa Scene of the Crime Operatives (SOCO) nga posibling mao kadto si Soria 

Daling nakig-alayon   sa Arizo Manpower Services sa dakbayan sa Mandaue ang mga sakop sa Homicide Section diin sila makakuha sa kompletong ngalan ug address ni Soria.

Matud ni Cuyos padayon nilang gipangita si Soria kay mao kini ang yawe sa kasulbaran sa maong hitabo. Wala isalikway sa kapolisan nga posibling gituyo sa pagsunog ang balay sa pamilyang Falcon aron dili mahibaw-an ang responsabli niini.  - BANAT NEWS