70-Anyos missing nalumos

CEBU, Philippines - Gituohang nalumos patay ang 70-anyos nga lolo nga niadto pang miaging Domingo nga na-missing ug napalgan nga patay nang naglutawlutaw sa dagat sa barangay Bonbon sa lungsod sa Aloguinsan niadtong Lunes sa alas 10:30 sa buntag.

Ang napalgang wala nay kinabuhi mao si Buenavenatura Panugaling Demol,70, ug molupyo sa sitio Colomna sa Brgy. Cantabugon lungsod sa Aloguinsan.

Matud ni PO2 Vincent Alquiza sa Aloguinsan Police Station dihang nahinabi sa Banat News ang kagawad sa Brgy. Poblacion nga si Rosana Jimenez maoy nakakita’s patay’ng lawas.

Daling miresponde sila si PO3 Eugene Macapaz ug mga kaubanan sakay sa Bantay Dagat patrol boat ug didto ilang gikuha ang patay’ng lawas. Ang kagawad sa barangay Cantabugon nga si Wilfredo Languido mao nay miila kang Demol.

Iyang gidugang nga niadto pang Domingo sa hapon mibiya sa ilang balay ug nananghid nga moadto sa dagat si Demol apan wala na mabalik. Ang municipal doktor mikompirmar nga pagkalumos ang gikamatyan niini. (/EIM)(BANAT NEWS)