CEBU, Philippines - Namatay sulod sa tambalanan ang usa ka 60 anyos nga lola nga nadasmagan og motorsiklo didto sa barangay Kadarohan, lungsod sa Borbon niadtong Domingo sa alas 5:30 sa hapon. Ang biktima mao si Sara Mangubat Judilla, 60, minyo ug molupyo sa nahisgutang lugar, samtang ang drayber sa motorsiklo nga Yamaha Crypton kolor blue KT-3644 mao si Guill Rishell Inoc, 28, minyo, nga taga barangay Tayud, lungsod sa Consolacion.
Si PO3 Rey Suson, desk officer sa Borbon Police mibutyag sa Banat News nga naglakaw sa daplin sa karsada ang biktima samtang ang motorsiklo nga gimaneho ni Inoc gikan sa siyudad sa Bogo paingon nang mopauli sa lungsod sa Consolacion sakay ang iyang asawa nga si Marites ug 4 anyos nga anak nga si Jane. Apan samtang nagdagan ang motor pag-abot sa maong lugar kalit lang mitabok sa karsada ang biktima nga wala makabantay nga may sakyanang nagdanga-danga kaniya busa nadasmagan kini.
Gumikan sa kakusog nga pagkadasmag, nabunal ang ulo sa biktima sa karsada.
Gihatod dayon kini sa kabanay ngadto sa Juan Dosado Hospital sa lungsod sa Sogod apan kagahapon sa buntag matud ni PO3 Suson gipahibawo sila sa mga kabanay nga namatay ang biktima sa usa sa mga pribadong tambalanan dinhi sa dakbayan.
Ang drayber sa motorsiklo boluntaryong mitahan sa iyang kaugalingon sa kapolisan ug kagahapon pormal na kining gipasakaan og kasong reckless imprudence resulting to homicide. (BANAT NEWS)