CEBU, Philippines - Naglisud ang kapolisan sa pagsikop kang Arnel Ansay Gomez alyas Budlat kay may anting-anting diay kuno kini.
Mao kini ang nasayran sa mga tawo nga nasinati ning maong kriminal kinsa ubay-ubay na og napatay nga naglakip sa duha ka police asset sa miaging Huwebes didto sa Carbon sa barangay Ermita, ning dakbayan sa Sugbo.
Gawas kang Budlat may mga sakop siya nga kaubang naglihok sa pagpakusog sa krimen nga pagpanulis ug pagpamusil dinhi sa Sugbo.
Usa sa sakop ni Budlat mao si Opaw kinsa iyang kauban niadtong Lunes sa buntag sa ilang pagsuroy-suroy aron manulis o kaha mamusil didto sa Pahina Central. Niadtong higayona nagsakay sa tagsa nila ka motorsiklo si Budlat ug Opaw dihang nakit-an sila sa kapolisan nga nagdala og high power nga mga pusil.
Didto magsugod nga gigukod sila sa kapolisan, apan si Budlat ray nadakpan kay si Opaw abtik man kaayong nakaipsot gikan sa naggukod kaniyang mga sakop sa Special Weapons and Tactics (SWAT) team.
Si Budlat maoy gitumbok nga mipusil patay sa duha ka police asset sa Cebu City Police Office nga sila si Catalino Entoma Jr., ug Michael Moralde Erasmo.
Ang taga Pahina Central nagduda gyud nga may anting-anting si Budlat kay makadaghan kini pauwani og bala sa mga sakop sa SWAT niadtong Lunes apan dugay kaayong naigo.
Naigo man gani apan tapsing lang sa bitiis, matud pa ni Simo usa sa mga molupyo nga nakasaksi sa pinusilay tali ni Budlat ug sa kapolisan.
Apan si Chief Inspector Romeo Santander, hepe sa Intelligence Branch di motuo nga may anting-ating si Budlat.
Kay alang kaniya human error, o misipyat gyud ang mga pulso sa kapolisan. Basta mokurog gani ang kamot natural mahiwi usab ang bala busa di gyud makaigo sa target, matud pa ni Santander.
Sa pagkakaron padayon pang gipangita sa kapolisan si Opaw nga nailhan kaayong sakop sa organisadong grupo sa mga kriminal ning dakbayan.
Gitataw si Santander nga pulos miyembro sa gun for hire sila si Budlat ug Opaw.
Si Budlat nagkagulkol na karon sa prisohan samtang gipaabot sa kapolisan ang mga nabiktima niini nga mopirma og apidabit batok sa maong dinakpan.(/WC)(BANAT NEWS)