Drayber natulog sa iyang taksi nadasmagan patay

CEBU, Philippines - Patay ang usa ka drayber sa taksi human mapiit samtang natulog sulod sa iyang gimanehong taxi dihang kalit lang gidasmagan sa naghaguros nga pribadong sakyanan kagahapon sa alas 4:10 sa kaadlawon diha sa atubangan sa Banilad Town Center (BTC) sa barangay Banilad ning dakbayan sa Sugbu.

Ang biktima giila sa traffic division sa Cebu City Police Office (CCPO) nga mao si Dindo Ornopia, 44, driver sa Corominas Taxi nga taga T. Padilla St., sa barangay T. Padilla ning dakbayan sa Sugbu.

Ang nakabangga sa biktima mao ang usa ka pribadong sakyanan nga Mitsubishi nga gimaneho ni Taya Kele Agno, 27, taga A.S. Fortuna sa dakbayan sa Mandaue.

Sa pasiunang imbestigasyon ni PO2 Wilfredo Caparida sa Traffic Division nagbutyag nga nahinanok og katulog sa luyong bahin sa taxi ang biktima dihang kalit nabanggaan ni Agno ang luyong bahin sa taksi sa biktima.

Tungod sa kakusog sa pagbangga nagusbat ang luyong bahin sa taksi ug napiit ang biktima samtang nagusbat usab ang atubangang bahin sa awto ni Agno.

Si Ornopia daling gidala sa ubang driver sa taxi sa Chung Hua Hospital apan nabugtuan kini sa iyang kinabuhi.

Kasong reckless imprudence resulting to damaged of property with homicide ang giandam sa kapolisan batok ni Agno kung dili magkasinabot ang duha ka habig. (BANAT NEWS)