CEBU, Philippines - Nasikop atol sa gipahigayong ronda sa mga sakop sa Criminal Investigation and Detection Group (CIDG)-7 ang usa ka lalaking gidudahang drug pusher kagahapon sa alas-5 sa buntag diha sa iyang pinuy-anan sa sitio Kamagong sa barangay Lahug ning dakbayan sa Sugbu.
Ang grupo ni Chief Insp. Fermin Armendares sa CIDG maoy misikop kang si Germigildo Catubay Lisondra, alyas ‘Bebot’, 51, lumad nga taga Negros Oriental tungod sa nadiskubrehang mga ilegal nga drugas ug armas sa balay niini.
Si Judge Enriqueta Belarmino sa Regional Trial Court Branch 57 mipagawas og search warrant sa balay ni Lisondra tungod sa giingong kalambigitan ni Lisondra sa illegal drugs.
Nakuha sa kapulisan sa balay ni Lisondra ang usa ka bulto ug laing napulo ka pakete nga pulos may sulod nga gidudahang shabu, usa ka .38 revolver nga may 10 ka buhing bala , tinfoil ug drug paraphernalia. Si PO3 Ramil Retuerto sa CIDG nga nahinabi sa mga tigbalita nagkanayon nga duha ka semanang gipanid-an sa CIDG si Lisondra tungod sa mga reklamo sa mga silingan niini.
Matud ni Retuerto nga level 2 drug pusher si Lisondra ug aduna kini usa ka kuwartong gihimong drug den sa mopalit kaniya og shabu.
Si Lisondra wala motubag sa mga pangutana sa mga sakop sa media kabahin sa pasangil batok kaniya. “Dili lang ko motubag, driver ra ko sa taxi,” sumala pang Lisondra dihang gipangutana sa mga sakop sa media sulod sa detention cell sa CIDG.
Kasong kalapasan sa pagpamaligya og ginadiling drogas ug kalapasan sa paghupot og armas nga walay lisensya ang giandam sa kapulisan. (BANAT NEWS)