Ash Wednesday karon; Saint Clare relic moabot sad

CEBU, Philippines - Mga sakop sa simbahang Romano Katoliko ang modagsa sa mga simbahan karong adlawa aron pag-obserbar sa ‘Ash Wednesday’ nga maoy timaan sa pagbukas sa Lenten Season.

Sa naandang tradisyon, tanang katoliko magpabadlis og krus gamit ang usa ka bendetadong abo isip pagsugat sa pag-abot sa Semana Santa.

Hinuon, wala gipugos sa simbahan ang maong tradisyon, apan gipahimangnuan ang mga katoliko nga moobserbar sa pamalandong ug paghinulsol sa ilang sala.

Gawas sa pagpabadlis, naandan na usab ang tradisyon sa pipila nga dili mokaon og karne ugmang adlawa ug mopalig-on pa sa ilang pag-ampo.

Sa laing bahin, maatol usab sa ‘Ash Wednesday’ ang pagbisita sa milagrosong relic ni St. Clare of Assisi gikan sa nasud sa Italy karong adlawa nga ilibot sa nagkadaiyang lugar sa nasud.

Ang pilgrim relic ni St.Clare moabot ugma sa alas-2:30 sa hapon diha sa Mactan Cebu International Airport ug ihatud kini sa Cebu Metropolitan Cathedral diin usa ka Santos nga Misa ang pasiugdahan ni Cebu Archbishop Jose Palma .

Usa ka public veneration ang sugdan ini’g alas-10:00 sa gabii diha sa cathedral ug sa sunod adlaw ibalhin kini ngadto sa Poor Clare Monastery sa Tayud, Consolacion diin kini magpabilin hangtud sa adlaw’ng Sabado.

Ang maong relic usa ka bukog gikan sa parte sa ulo ni St.Claire kinsa mao ang ‘Patroness of the Television.’

Ang chairman sa The Freeman ug Banat News nga si Dr. Jose ‘Dodong’ Gullas nga usa sa mga nangusog nga madala ang relic dinhi sa nasud personal nga miimbitar sa mga Sugbuanon nga pahimuslan ang maong talagsaong kahigayunan nga mosud-ong sa relic sa balaang Santos. (BANAT NEWS)