Capitol building lig-on pa

CEBU, Philippines - Gipaniguro sa Provincial Engineering Office nga pabiling luwas ug loyo sa kakuyaw nga maguba o mahugmak ang Legislative Building sa Kapitilyo human kini tay-oga sa 6.9 magnitude nga linog niadtong Pebrero 6, 2012 dungan sa lalawigan sa Negros Oriental.

Kini ang unod sa Certification Letter nga giluwat ni Engr. Eulogio Pelayre ang Officer in Charge ug Assistant Provincial Engineer sa lalawigan ngadto kang Vice Governor Agnes Magpale.

Matud pa ni Pelayre nga nagpabiling lig-on ang structural integrity sa maong building sanglit superficial o mabaw ra kaayo ang nakitang mga liki niini.

Ang maong certification gipagawas ni Pelayre human imando sa bise gobernador nga susihon ang mga liki sa building kun dili ba kuyaw sa mga nag-opisina niini.

Ang maong edipisyo gigamit sa mga kawani sa legislative department ug sa rehiyonal nga buhatan sa Department of Agrarian Reform (DAR)7.

Si Magpale sa iyang mando miingon nga angayan lang masiguro nga luwas ang maong building aron may kasiguruan ang kinabuhi sa mga tawo nga mosulod ug mogawas sa maong edipisyo   matag adlaw.

Hinuon karong nadawat na sa bise gobernador ang pasalig ni Pelayre nawagtang ang kabalaka niini bahin sa Capitol   building. (/WC) (BANATNEWS)