Sa SRP i-selebrar sa mga Sugbuanon ang pagka-Santos ni Beato Calungsod

CEBU, Philippines - Gitugotan ni Mayor Michael Rama ang hangyo sa mga kaparian nga adto himuon sa dakong hawanan sa South Road Properties (SRP) ang dakong selebrasyon atol sa gikatakdang pag-canonize ni Beato Pedro Calungsod karong Oktubre 21, 2012 sa Vatican City.

Nagkanayon si Rama nga dako kaayong garbo sa mga Filipino si Calungsod busa angayan kini og tagaan og dakong selebrasyon pinaagi sa dakong kooperasyon sa siyudad sa Simbahan. Giandam sa dakbayan ang himuong mga programa nga ipaagi sa Cultural and Historical Affairs Commission (CHAC).

Si Calungsod usa ka sakristan nga gipatay human sa iyang sagunson nga misyon sa Guam uban sa mga Espanyol nga pari 350 ka tuig na ang nakalabay. (BANATNEWS)