Jeepney operators 'misulong' sa Lapu'CH

CEBU, Philippines - Nagpanon ang mga operators ug drivers sa jeepney sa Cordova kagahapon sa buntag aron sa pagprotesta sa gihimong re-routing scheme sa maong rota sa dakbayan sa Lapulapu.

Si Lapulapu City Mayor Paz Radaza personal nga miatubang sa mga raliyista uban ni CTMS Director Frank Brazil ug Secretary to the Mayor Rolando Duero aron sa pagpasabot sa katuyoan sa maong re-routing scheme.

Atol sa maong panagtagbo nila ni Gregory Perez, usa ka jeepney operator ug sakop sa Nagkahiusang Drayber sa Sugbu (NADSU) nga maoy nangulo sa maong protesta kini mihangyo ngadto ni Radaza nga dili tas-on ang adlaw sa gihimong experimental re-routing scheme.

Lakip sa ilang hangyo ang paghatag kanila og higayon nga makakuha og pasahero sa merkado publiko sa dakbayan ini’g balik nila ngadto sa Cordova tungod kay apektado ang ilang panginabuhian.

Apan sila gipasabot ni Radaza nga tiwason gyud ang duha ka semanang pagtuon sa maong re-routing scheme tungod kay sayo pa kaayo aron mokisikisi ang mga reklamante gumikan kay ila pang giobserbahan kung unsay epekto niini sa gibug-aton sa trapiko sa naapektahang mga dalan. (BANATNEWS)