Naalaang kaaway gipusil sa tanod

CEBU, Philippines - Usa ka ulitawo kinsa naalaang kaaway, gipusil angol sa barangay tanod sa barangay Tejero, dakbayan sa Sugbo didto sa   may Blessed Sacrament, sa maong barangay kagahapon sa alas 2:00 sa kaadlawon. 

Ang biktima nailhan nga si Gilbert Rosos, 24, molupyo sa maong lugar samtang ang barangay tanod nailhan nga si Nestor Ybañez.

Sa inisyal nga imbestigasyon sa kapolisan nasayran nga ang biktima nagsakay sa iyang bisekleta apan kalit nga natagak ang battery sa iyang cell phone busa mihunong kini sa pagpunit sa maong battery.

Apan mao usay pag-abot sa suspetsado nga nagsakay og motorsiklo dayon gitirohan siya sa buko-buko.

Busa midagan ang biktima ug miambak    sa sapa sa maong lugar dihang gigukod siya kay usban pa sa pagpusil.

Apan tungod kay gitabang siya sa iyang kaliwat, wala na mopadayon ang suspetsado sa paggukod kaniya.

Gihatod dayon ang biktima ngadto sa Chong Hua Hospital. 

Sa pakighinabi sa Banat News ni PO3 Ruth Violanggo sa Cebu city Police Office, Homicide Section mibutyag kini nga posibling naalaan lang ang biktima .

Matud pa ni Violanggo nga sayo niini may gikabangi ang suspetsado nga laing tawo ug malagmit naalaan ang biktima nga iyang kontra.

Midugang si Violanggo nga sa ilang nakuha nga impormasyon walay kontra   ang biktima sa ilang dapit.

Padayon usab nilang gipangita ang suspetsado aron sutaon nganong iyang gipusil ang biktima nga angayan usab niyang panubagan ang maong krimen.  - BANAT NEWS