Road-widening nakalangan sa pag-ugmad sa relocation site sa Mandaue

CEBU, Philippines - Ang pagpalapad sa dalan paingon sa 6.5 ektarya nga relocation site sa barangay Paknaan nga pagabalhinan sa mga urban poor gikan sa kuyaw nga mga lugar maoy hinungdan sa kalangan sa maong proyekto sa kagamhanan sa maong dakbayan.

Si Atty. Francisco Amit nga urban poor consultant sa kagamhanan sa maong dakbayan mipadayag nga adunay mga estraktura nga nagkinahanglan pang maigo sa pagpalapad sa maong dalan.

Hinuon si Amit miingon nga 30 ka mga pamilya na ang kasamtangang nagpuyo sa maong dapit ug nalakip na niini ang 19 ka pamilya nga daan na nga nagpuyo sa maong dapit.

Si Mandaue City Legal office Atty Jovanni Tianero nga nahinabi sa mga tigbalita miingon nga gipanag-iya sa kagamhanan sa Mandaue ang maong luna nga naigo sa pagpalapad sa maong dalan.

Dugang pa niya nga ang kagamhanan mahimong mopaguba sa maong mga estraktura kun ang mga tag-iya magmagahing bulontaryo nga gubaon ang ilang mga balay.

Hinuon si Amit miingon nga ang pagtanyag sa mga lainlaing pribadong sektor maoy ilang gituohang makapadali sa kaugmaran sa mga housing program sa kagamhanan.

Ang mga pribadong sektor nga nagtinguha pagtabang sa katukoran sa mga panimalay sa maong lugar mao ang Gawad Kalinga Foundation, Ramon Aboitiz Foundation ug uban pa. (BANATNEWS)