CEBU, Philippines - Mapasalamaton kaayo sa ilang mayor sa lungsod sa Barili ang napulo ka parisang magtiayon nga gihiusa sa kaminyoon pinaagi sa mass wedding nga gipahigayon didto sa maong lungsod niadtong Pebrero 14, 2011.
Si Rene Alquizola , usa sa mikandidato pagka-konsehal sa lungsod sa Barili sa miaging eleksyon ug usa sa misuporta sa maong kalihokan nga mass wedding mibutyag sa Banat News nga dugay nang nagpuyo nga dili kasal ang maong magtiayon.
Si Alquizola kinsa usa ka retiradong manager sa DYMR Radyo ng Bayan Cebu miingon usab nga ang ubang magtiayon mga dagko na og anak ug ang usa sa hinungdan nga wala sila makapakasal mao ang kakuwang sa ikagasto .
Apan matud pa ni Alquizola nga gumikan sa kaluoy ni Mayor Teresito Mariñas kanila, mitanyag kini og mass wedding sa nahisgutang mga parisan ug didto sila hiusaha sa pagkasal sa Santa Ana Shrine, pinaagi ni Padre John Velarde ang kura paroko sa Barili.
Si Alquizola kinsa igsuon ni anhing mayor Roberto Bobby Alquizola sa maong lungsod nagkanayon nga usa usab siya sa mosuporta sa lain pang mass wedding nga gitakda gihapon karong umaabot nga Hunyo sa maong lungsod.
Gani sa pagkakaron ubay-ubay nang mga magtiayon nga wala makasal ang nadasig nga mosalmot usab sa mass wedding nga umaabot human nila masaksihi ang kaalegre sa mass wedding sa miaging Valentine’s Day.
Gani atol sa maong mass wedding, usa ka inahan nga si Glenn Alga kinsa usa sa nakaapil sa maong nagpakasal sa maong higayon nakahilak sa iyang kalipay .
“Kung wala pa ning tabang ni Mayor Marinas, magpabilin unta kaming wala makasal ug grasya sa sakramento sa kaminyoon sa simbahang Katoliko”, matud niya.
Pipila sa mga principal sponsor mao sila Dr.& Mrs. Antonio Yapha, Jr, Dr. Teresito Marinas, kanhi bise mayor Jose Antonio Nemeno ug mga representante ni kanhi Senador Sonny Osmeña, Atty. Junjun Davide, Bise Gob. Agnes Magpale, Businessman Tony Paras ug Banker Enrique Abellana. (BANATNEWS)