Giluba sa silingan likod buslot

CEBU, Philippines - Nabuslot ang bukobuko sa usa ka tawo human kini dunggaba sa iyang mga silingan didto sa sitio Sta. Maria sa barangay Pusok, dakbayan sa Lapulapu, sa miaging kaadlawon.

Ang biktima mao si Milky Manango, 26 , ulitawo, samtang ang suspetsado mao sila si Anton Bonghanoy, uban sa   duha ka menor de edad nga lalaking silingan niini. Si SPO1 Allan Pantaloon sa kapolisan sa homicide section sa kapolisan sa maong dakbayan nga nahinabi sa Banat News miingon nga gikan pa nga nag-inom ang biktima kuyog sa mga higala niini.

Dihang nasugatan niini sa dalan ang tulo ka mga suspetsado ug gumikan kay pulos na lasbag, nagpasingit og estorya ang magkaatbang nga grupo nga misangpot sa ilang pagsinumbagay diin gitabangan sa mga suspetado ang biktima og kulata. Apan gumikan kay kanunay nga motan-aw sa duwa ni Pacquiao, ang biktima pirme usab nga makaigo sa tulo niya ka kaaway .

Dihang nakita sa suspetsado nga maglisud sila sa pagpalukapa sa biktima, gibirahan niya kini og kutsilyo ug giduslak ang buko-buko sa biktima.

Misagiwsiw ang daghang dugo gikan sa nabuslot nga likod sa biktima ug dali kining gihatod ngadto sa Lapulapu City Hospital apan gibalhin dayon kini ngadto sa Vicente Sotto Memorial Medical Center sa dakbayan sa Sugbo.

Ang mga suspetsado kinsa nakasibat dayon human mahagba ang biktima sa yuta padayon pang gipangita sa kapolisan karon. (BANATNEWS)