CEBU, Philippines - Patay nang nahidangat sa tambalanan ang 75 anyos nga lolo human kini dasmagi sa motorsiklo sa iyang paglabang sa highway didto sa barangay Binabag ,siyudad sa Bogo niadtong Biyernes sa alas 6:10 sa gabii.
Ang biktima mao si Alexander Comita, 75 , minyo nga nagpuyo sa nahisgutang lugar, samtang ang Honda XRM nga motorsiklo kolor blue nga dunay plaka nga 5646 YA nga midasmag kaniya gimaneho ni Jose Ronald Gomez, 31, minyo, nga taga Cambanay, siyudad sa Danao.
Si PO2 Jerry Dela Cruz sa Bogo City Police Station mibutyag sa Banat News nga ang biktima naglakaw daplin sa karsada samtang ang motorsiklo gikan sa Poblacion , Bogo nga paingon na untang mopauli sa Danao City sa dihang pag-abot niini sa kurbadahong bahin sa karsada sa maong lugar kalit lang milabang ang biktima busa nadasmagan kini
Gumikan sa pagkalamba sa ulo sa biktima sa sementadong karsada nawad-an kini og panimuot ug dihang gidala sa Verallo District Hospital sa Bogo gideklarar kining dead on arrival sa mga doktor.
Samtang ang drayber sa motor nga nakaangkon usab og gamay’ng mga bun-og sa lawas human kini malamba uban sa iyang motor boluntaryo nga mitahan ngadto sa kapolisan sa Bogo ug gibalhog kini sa prisohan samtang nagpaabot sa tukmang kiha nga isang-at batok kaniya. (BANATNEWS)