Mipalusot og shabu sa CCJ sakpan

CEBU, Philippines - Usa ka lola nga mobisita unta sa iyang anak nga bilanggo sa Cebu City Jail ang nagtingkagol na hinuon sa karsel human kini giingong nakuhaan og pinaketeng shabu diha sa iyang bulsa niadtong milabay’ng hapon.

Si Supt. Johnson Calub, Jail Warden sa Cebu City Jail nga nahinabi sa Banat News miila sa dinakpan nga mao si Gloria Delos Reyes, 63, nga taga Spolarium St., sa barangay Duljo Fatima.

Si Delos Reyes mibisita sa iyang anak lalaki nga piniriso pasado alas-3 sa hapon niadtong Huwebes.

Apan sa dihang girekisa si Delos Reyes sa babayeng jailguard nga si JOI Gretchen Ramis nakit-an ang gamay nga plastic sa luyong bulsa niini nga nasuta nga pito diay ka paketeng gidudahang ang sulod shabu.

Si Delos Reyes kusganong mihimakak sa maong alegasyon apan   bisan pa niini gibalhog kini sa usa ka police station dinhi sa dakbayan sa Sugbu ug gipaabot nga pasakaan og tukmang kaso sa mga jailguards ngadto sa Cebu City Prosecutors Office. (BANATNEWS)