CEBU, Philippines - Patay ang usa ka retiradong empleyado sa Philippine Air Lines (PAL) human kini naghikog pinaagi sa pagpusil sa iyang ulo sulod sa kwarto sa ilang pinuy-anan diha sa T. Villa St., sa barangay T. Padilla ning dakbayan sa miaging hapon.
Sa pasiunang imbestigasyon ni SPO1 Victor Ruel Ayuman ug mga kaubanan sa Homicide Section sa Cebu City Police Office (CCPO) ilang giila ang naghikog nga mao si Oscar Villa Estrella,72.
Nakuha sa kapulisan sa crime scene ang usa ka .38 paltik revolver nga may upat ka buhing bala sa tambor niini ug usa ka itom nga holster niini.
Ang asawa nga si Dolores,78, mitug-an ni Ayuman nga nagtabi pa silang duha sa iyang bana samtang naniudto ug pagkahuman misaka kini sa taas sa ilang balay ug nadungog nalang niya ang usa ka masipang buto.
Dali niyang gisusi ang ilang kwarto sa taas apan gikandado kini sa sulod hinungdan nga iya nalang gipatiran ug naabli ug mao nalay misugat kaniya ang iyang bana nga nagkadugo ang ulo.
Gidala nila ngadto sa Chung Hua Hospital apan ang mga doktor nga miatiman niini mideklarar nga patay na kini.
Dugang pakisusi ni Ayuman ug mga kaubanan, ilang nasayran sa asawa nga gi-schedule na unta alang sa usa ka by-pass operation sa kasingkasing ang namatay apan gituohang tungod sa pinansyal nga problema wala nalang kini magpaopera.
Nagtuo ang kapulisan nga mao kini hinungdan nga naghikog si Villa Estrella. (BANATNEWS)