CEBU, Philippines - Gihasi og lima ka sunod -sunod nga pagpanulis ang lungsod sa Badian niadtong milabay’ng Huwebes diin ang mga biktima mga lending collectors ug ahente sa kompaniya.
Ang unang insidente nahitabo sa sitio Highway barangay Poblacion sa alas 12:30 sa udto diin ang biktima mao si Dave Gregorio, 32, lending collector sa BLB Finance Lending Corp. nga nagbase sa siyudad sa Talisay.
Nakuha gikan niya mao ang iyang cellphone ug koleksyon nga moabot og P7 mil.
Duha ka mga lalaking nagsakay og itom nga motorsiklo nga way plate number ang gitumbok nga maoy responsable sa sunod-sunod nga pagpanulis.
Matud ni PO1 Randy Balansag, imbestigador sa Badian police station gisundan kini sa laing pagpanulis ligas lang og pipila ka minutos sa sitio Mandag-om barangay Matutinaw diin ang nabiktima ning higayuna mao si Jessie Jayno, 33, kolektor sa Reynaldo Lending nga nagbase sa Dumaguete City nga nakuhaan og cellphone ug P10 mil nga iyang koleksyon.
Pagkahuman nipasirit og padagan ang mga armadong tulisan paingon sa direksyon sa lungsod sa Alegria apan pag-abot sa barangay Proper Matutinaw naagian sa duha ang naghunong ang panel sa laing ahente nga si Gabriel Espiritu, 32, taga Basak siyudad sa Mandaue ug ahente sa Witgolf Company.
Matod ni Balansag kalit gihunongan sa duha mga tulisan ug gitionan og armas si Espiritu dayong kuha sa P5 mil nga halin niini ug giapil pa ang brown nga pitaka niini nga dunay sud nga P400 ug driver’s license.
Pagkahuman niini mipasirit ang duha sa barangay Balhaan ug naagian ang biktimang si Vernon Sabal, 31, nga ahente sa Rebisco Biscuit nga ilang gisikitan ang trak dayun gipara ug paghunong gitionan ang biktima og armas dayong deklarar og tulis. Gikuha sa mga tulisan ang P6 mil nga halin ni Sabal dayong ikyas apan pag-abot sa unahan naagian na usab nila ang ahente sa Fiber World Company nga taga Tuyan, Naga ug gitulis usab kini ug gikuha ang P16 mil.
Ang mga polis nga miresponde wala na makaapas pa sa mga tulisan nga miikyas padulong sa Alegria. (BANATNEWS)