CEBU, Philippines - Usa ka 56- anyos nga mag-uuma nga nabalaka sa kinabuhi sa anak nga nagtrabaho sa usa ka coal mine ang naghikog diha sa sitio Tan-awon sa barangay Cansuji sa lungsod sa Argao.
Si Cesario Papalid Bajenting, 56, biyudo nga nagpuyo sa maong dapit nakit-ang nagbitay nga wala nay kinabuhi sulod sa iyang payag alas 5:00 sa buntag sa miaging buntag.
Matud ni PO2 Manuelito Abrinica ang desk officer sa Argao Police Station dihang nahinabi sa Banat News base sa gitug-an sa mga kabanay ni Bajenting nahiubos ang naulahi sa iyang anak nga si Dedil Bajenting.
Giingong gihangyo kini sa namatay nga dili motrabaho sa minahan tungod sa kapeligro niini ug nadugangan ang kabalaka niini tungod sa nahitabong linog nga gisundan og mga aftershocks.
Matud ni Abrinica ang 13- anyos nga batang lalaki nga silingan sa namatay maoy nakadiskubre sa patay’ng lawas dihang gisugo kini sa inahan nga mangayo og kamunggay. (BANATNEWS)