Dalaga gipusil sa tulisan

CEBU, Philippines - Usa ka babaye ang talandugon ang kahimtang human pusila sa mga tulisang mitulis kanila samtang nanglingkod sa gawas nga bahin sa tindahan diha sa sitio Canlingo sa barangay Sabang siyudad sa Danao niadtong Miyerkules sa alas 12:50 sa kaadlawon.

Ang biktima nga napusilan sa dughan mao si Rosemary Badayos, 18, taga Mahayahay Maslog, Danao City. Kauban ni Badayos nga gitulis sila si Catalina Bacalso,18, taga barangay Sabang, Charmine Mangubat,18, taga Sityo Canlingo Sabang ug Marivic Baco,32, nga day care teacher nga taga Bulwang lungsod sa Compostela.

Hinuon wala malingaw ang mga suspek sa ilang tinulis tungod kay sila nadakpan dayon sa hot pursuit operation sa kapulisan nga giilang sila si Raymund Impormado,18, Alejandro Traya, 22, taga sitio Ylaya barangay Poblacion sa maong siyudad ug Junard Laguna, 24, taga Looc, sa mao gihapong siyudad.

Matud ni PO1 Faron Avila ang desk officer sa Danao City Police nga nahinabi sa Banat News nagtabi ang mga dalaga sa gawas sa tindahan dihang kalit miabot ang mga suspek nga nag- angkasay sa usa ka motorsiklo.

Ang duha nga nag-angkas nga wa magsul-ob og bonnet miduol sa mga biktima ug gitionan sila og armas dayong deklarar og tulis ug gipangayo ang ilang mga cellphone.

Dihang nakuha na sa mga suspek ang tulo ka cellphone gikan sa mga biktima gihapit pa gyud og pusil sa usa sa mga tulisan si Badayos sa dayon niining sakay og balik sa motor.

Si Badayos naigo sa ibabaw’ng bahin sa dughan ug daling gihatud sa Danao City District Hospital apan tungod kay talandugon ang kahimtang gibalhin kini sa tambalanan dinhi sa dakbayan sa Sugbo.

Base sa nakuhang mga impormasyon gisundan sa kapolisan ang mga tulisan ug ilang naabtan sa barangay Tuburan Sur ug nakuha gikan sa ilang posesyon ang .38 kalibre nga paltik nga dunay usa ka buhing bala ug duha ka basiyo sulod sa tambor niini.

Apil sa nasakmit ang usa ka motorsiklo nga wala’y plate number. Si Impormado maoy gitudlo sa mga biktima nga maoy nagpusil kang Badayos. (/EIM) (BANATNEWS)