CEBU, Philippines - Gihimakak sa retiradong polis nga nasikop sa buybust operation sa kapulisan sa lungsod sa Argao niadtong Miyerkules nga namaligya siya og shabu ug iyaha usab gihimakak nga iya ang tanang nakuhang shabu sa kapolisan gikan kaniya.
Si Allan Kintanar miingon nga wala gyud siya mamaligya og shabu sanglit para lang kadto sa iyang konsumo ug wala niya angkona ang 32 ka paketeng nakuha sa kapolisan tungod kay napulo ra ka pakete ang naa sa iyang bulsa.
“Wala man ko mamaligya, dili to tanan ako, napulo ray akoa ato para kunsumo rato nako, nagduwa ra gani ko og mahjong ila ra kong gipasakay og kalit sa patrol ug gidala sa police station,duna man gud batan-on nga praning-praning didto maoy nisumbong nga namaligya kuno ko,” asoy pa ni Kintanar.
Si Kintanar nga nahinabi sa mga tigbalita nagkanayon nga niadtong 1995 siya misuway paggamit og shabu samtang nadestino pa siya sa Badian Police Station apan ‘tilaw-tilaw’ lang panahon kun dunay mga okasyon ug gani negatibo siya sa gipahigayong surprise drug test niadtong tungora.
Si Sr. Supt. Patrocinio Comendador, hepe sa kapulisan sa probinsya sa Sugbu nagkanayon nga niadtong 1996 ug nadestino pa siya sa Provincial Intelligence Branch (PIB) ilang gironda ang balay ni Kintanar sa lungsod sa Argao human sila makadawat og report nga nalambigit sa illegal nga kalihokan si Kintanar.
Apan si Kintanar miingon nga ang iyang ig-agaw mao ray nadakpan nila ni Comendador niadtong higayona.
Ning bag-ohay lang, si Kintanar nadakpan sa buybust operation niadtong Miyerkules sa alas-11 sa buntag sa sitio Looc sa barangay Poblacion nga gipangulohan ni Insp. Alejandro Batobalonos.
Nakuha gikan sa posesyon ni Kintanar ang 31 ka pakete walay labot sa usa ka paketeng gipalit sa police decoy.
Si Kintanar nangayo og pasaylo sa duha niya ka mga anak nga bag-o pa nga nahimong polis tungod sa nasudlan niyang kontrobersya.
“Mangayo lang ko og pasaylo sa akong mga anak,” mubo nga pulong nga gipaabot ni Kintanar ngadto sa iyang pamilya ug anak.
Kagahapon sa hapon si Kintanar gidala na sa kapulisan sa Provincial Prosecutors Office aron pormal nga ipasaka ang kasong kalapasan sa Section 5 ug 11 sa Article 2 sa Republic Act 9165. (BANATNEWS)