CEBU, Philippines - Nalandig sa tambalanan ang usa ka lola kansang pus-on nasabak sa bala nga milapos sa iyang sampot human pusila sa usa sa tulo ka tulisan nga misuway og tulis kanilang magtiayon didto sa barangay Campo 7, sa lungsod sa Minglanilla.
Ang biktima mao si Lucila Avilla, 71, kinsa nasabak sa pus-on ug milapos sa iyang sampot ang bala.
Si SPO1 Rolando Bastida sa Minglanilla Police Station nga na-interview sa The Freeman igsuong pamantalaan sa Banat News nagkanayon nga naninda og gasolina ang biktima uban sa iyang bana nga si Valintin Avilla, 79 sa ilang pinuy-anan sa Campo 7.
Dihang may usa ka motorsiklo nga gisakyan sa tulo ka wala hiilhing mga lalaki ug usa niini ang nanaog ug mipalit og usa ka litrong gasolina nga gisulod sa botelya.
Human kini itubil sa ilang motor, giuli sa lalaki ang botelya dayong lanit sa dala niining armas de fuego uban sa pagdeklarar nga tulis.
Ang pag-umangkong lalaki sa biktima nga si Loleng Pacalina, 30 nga kauban nilang magtiayon maoy misinggit ngadto sa biktima nga ihatag nalang ang kuwarta niini ngadto sa tulisan.
Apan dihang nalipat ang tulisan, dali kining gilayog ni Pacalina ug gisuwayan og ilog ang armas dihang kalit kining mibuto ug naigo ang biktima.
Human molampos si Pacalina sa pag-ilog sa armas, midagan ang tulisan ug misakay kini og balik sa nagpaabot nga motorsiklo.
Gikablit ni Pacalina ang gato sa armas sa tulisan apan natagak ang magazine niini busa wala kini makabuto.
Matud ni Bastida walay nadalang kuwarta ang mga tulisan kinsa daling misibat paingon sa barangay Tabunok.
Si Valintin nga tigulang na usab kaayo maoy daling miatiman sa iyang asawang samaran ug mihatud niini sa Vicente Sotto Memorial Medical Center sa dakbayan sa Sugbo.
Gihulagway sa mga biktima nga usa sa mga tulisan yapison og lawas kinsa padayon pang gipangita sa kapolisan.
Samtang laing mga biktima sa mga tulisang de motor mao ang magsuong Marites ug Ginacita Dela Torre, pulos hingkod, nga taga Poblacion Ward 2 sa lungsod sa Minglanilla.
Matud pa sa kapolisan sa maong lungsod nga ang mga biktima gikang nag- withdraw og kuwarta sa usa ka ATM Machine sa usa ka mall sa Poblacion Ward 2 sa miaging gabii dihang kalit silang gitionan og armas sa tulo ka wala hiilhing tulisan.
Nakuha sa mga tulisan gikan sa magsuong Dela Torre ang duha ka cell phone, P22 mil nga cash, duha ka relo, postal I.D ug duha ka ATM card.
Padayon pang gipangita sa kapolisan ang mga tulisan. - BANAT NEWS