Paggamit sa heavy equipment sa siyudad pabantayan

CEBU, Philippines - Misugyot si Konsehal Alvin Arcilla ngadto kang City Engineer Kenneth Enriquez nga kinahanglan nga bantayan kanunay ang mga proyekto sa siyudad sa Sugbo nga kasamtangan karon nga gihimo aron maseguro kung gigamit ba gyud sa saktong oras ang mga heavy equipment.

Nasayran nga minilyon ang gibayad sa siyudad sa pag-abang sa mga heavy equipment alang sa mga infrastructure projects .

“Mas maayo gyud nga dunay mobantay sa mga projects , kay per hour baya ang abang sa mga equipment,” sumala pa ni Arcilla.

Samtang giangkon ni Enriquez kagahapon nga dili matag adlaw nga ma-monitor sa iyang mga inspectors ang mga proyekto gumikan kay duna pud kini laing gitrabaho.

Mihangyo hinuon si Enriquez ngadto sa mga opisyales sa barangay nga motabang sa pagbantay sa mga proyekto nga gibuhat sa ilang dapit.

Ang siyudad sa Sugbo nangabang og mga equipment sa nagpadayon karon nga mga road concreting sa mga bukirang barangay, dredging sa mga kasapaan, pagpalambo sa drainage system ug uban pa.  - BANAT NEWS