CEBU, Philippines - Tungod ba kaha sa pagkasaba sa iyang inahan ug sa gibating kahiubos, usa ka 17-anyos ang naghikog gamit ang liston sa sapatos ug napalgan kagahapon na sa buntag duol sa ilang pinuy-anan diha sa sitio Kadahuan sa barangay Talamban sa dakbayan sa Sugbu.
Ang 42-anyos nga inahan sa naghikog mitug-an sa kapulisan nga alas 6:15 kagahapon sa buntag nasurpresa siya dihang iyang nadiskubrehan ang iyang anak nga nagbitay sa brace sa poste sa Visayan Electric Company (Veco) Tower gamit ang shoelace nga gihigot sa liog niini.
Matud ni PO1 Esmer Escultor sa Homicide Section sa Cebu City Police Office dihang nahinabi sa Banat News alas-10 sa miaging gabii atol sa Valentine’s Day nahubog ang batan-on ug nakasab-an sa inahan tungod niini.
Dugang ni Escultor mipauli ang batan-on ug nanghagis ug pagkahuman milakaw apan kagahapon sa buntag napalgan na lang kining nagbitay na sa poste ug patay na. Samtang sa pikas bahin, wala na makaselebrar sa Valentine’s Day uban sa iyang asawa ug anak ang usa ka taxi drayber human kini namatikdang patay na sa iyang asawa ug anak samtang natulog niadtong Martes sa kaadlawon diha sa ilang giabangan nga balay sa Cabancalan 2 sa barangay Bulacao. Ang namatay mao si Rufino Dela Piedra, 34, nagpuyo sa maong lugar kinsa namat-an sa asawang si Rosela, 30, niadtong Martes nga patay na kini.
Gituohan nga giatake sa sakit ang biktima apan gisugyot sa kapolisan nga ipa-awtopsiya ang patay’ng lawas aron masusi ang hinungdan sa kamatayon niini. - BANAT NEWS