CEBU, Philippines - Usa ka retiradong polis kinsa nahimo nang level 2 big time drug pusher nasikop sa buy bust operation didto sa Sitio Looc Poblacion , lungsod sa Argao kagahapon sa alas 11:00 sa buntag.
Ang nasikop nga suspetsado mao si Ret. Police Officer 3 Allan Teo Kintanar, 45, minyo, nga taga Sitio Suba, barangay Poblacion, Argao kinsa nasakmitan og 32 ka paketeng shabu ug kuwarta nga P2,700.
Si Kintanar gitakda nga magsugod na unta og kobra sa iyang retirement sa sunod buwan.
Si Insp. Alejandro Batobalonos, hepe sa Argao Police Station mibutyag sa Banat News nga dugay na nilang gipanid-an ang suspek tungod sa daghang reklamo batok sa pagpamaligya og shabu niini.
Matud pa ni Batobalonos nga sobra na ka dayag ang pagpamaligya og shabu sa suspetsado kay bisan sa daplin sa karsada mohatag kini og shabu sa iyang mga suki ug wa nay respeto sa publiko ilabi na sa mga otoridad.
Maoy hinungdan nga dihang nadawat nila ang taho kalabot sa kalihokan sa suspetsado iya dayong gitigom ang iyang mga sakop alang sa buy bust operation nga gilusad nila.
Usa ka polis nga gipapurong og panapton nga murag drayber sa habal-habal maoy nagpakaaron-ingnong mamamalit og shabu.
Gitunol dayon sa suspek ang shabu ug dihang gidawat usab niini ang markadong P500 isip bayad, diha-diha gipabalikosan dayon sa posas ang mga kamot niini.
Misuway pa unta og lugnot ang suspek apan nakuptan kini sa mga polis busa wala na siya makadagan. Sa pag-abot didto sa police station didto madiskobrehe sa kapolisan ang 31 ka pakite nga shabu ug ang cash P 2,700.
“Gikumot- kumot ang kwarta niini sa iyang bulsa nga posibleng halin sa shabu , matud pa ni Batobalonos.
Si Kintanar nagkagulkol na karon sa karsel samtang gihikay pa ang kasong ipasaka batok niya. - BANAT NEWS