May mga tunghaan sa Mandaue ug Talisay miliki

CEBU, Philippines - Hingpit nang gidili sa city engineering office sa Mandaue nga dili luwas ang mga classroom sa Opao Elementary School sa barangay Opao ug Umapad Elementary School sa barangay Umapad sa maong dakbayan.

Kini human sa gihimong joint inspection niadtong miaging adlaw nga gipangulohan nila ni Konsehal Demetrio Cortes Jr., nga maoy chairman sa committee on education sa konseho sa maong dakbayan uban sa duha ka mga engineer sa maong dakbayan nga sila si Engr. Ceres Menderico sa City Engineers Office ug Nicasio Cortes nga maoy coordinator for physical facilities sa Department of Education (DepEd) Mandaue City Division.

Giinspeksiyon ang 39 ka mga pangpublikong tunghaan sa dakbayan nga gilangkoban sa 24 sa elementarya ug 15 ka high schools pipila ka adlaw human sa 6.9 magnitude nga linog sa Central Visayas.

Matud pa ni Mederico nga dunay mga dagkong liki nga ilang nakita sa Opao Elementary School ug Umapad Elementary School ug peligro kining klasehan. Matud pa niya nga dunay mga liki nga masulod pa ang kamot sa tawo.

Gawas niini duna say mga edipisyo ang nakabaton og ginagmay lamang nga mga kadaot nga mao ang Paknaan Elementary School,Tabok I, Tabok II, Tingub, Banilad, Tawason,Casili, ug Cabancalan High School.

Si Konsehal Cortes miingon ilang gipaabot ang rekomendasyon sa mga engineers sa dili pa usab niya iduso ang paggahin og salapi gikan sa panudlanan sa Special Education Fund sa maong dakbayan.

Sa Talisay City, usa ka edipisyo nga may tulo ka andana nga gilangkuban sa siyam ka classroom sa San Roque Elementary sa barangay San Roque ang girekomendar sa city engineers nga dili una ipagamit paglikay sa disgrasya tungod sa daghang mga liki ug dunay mga debris ang nagpangatagak. Si Talisay City engineer Audie Bacasmas mibutyag nga human sa linog mipahigayon sila og inspeksyon sa tanang mga edipisyo sa siyudad pribado ug publiko.

Matud ni Bacasmas nga base sa report sa iyang sakop ang nahisgutang 16-anyos nga edipisyo dunay mga dagkong liki ilabi na sa mga haligi ug column niini ug dunay mga debris nga nagpangatagak.

Ang city engineering magpahigayon og evaluation sa maong building ug gisubay pa usab nila ang mga dokumento niini aron masuta kung kinsa ang contractor. Sa laing bahin, si Lolita Lim, prinsipal sa maong tunghaan nagkanayon nga sayo niadtong buwan sa Hulyo sa milabay’ng tuig pa wala na niya ipagamit ang ikatulong andana sa nahisgutang building tungod sa mga liki.

Aron di mabiyaan sa leksyon ang mga bata gibahinbahin nila ang oras sa tingklase ngadto sa tulo ka grupo sugod sa alas 6:30 sa buntag hangtud sa alas 12:30 sa hapon dayon laing grupo na usab sa alas 12:30 hangtud na sa hapon. (Uban sa report ni Brenda D. Batuto/EIM) (BANAT NEWS)