CEBU, Philippines - Usa ka drayber sa habalhabal ang napalgang patay nga gituohang gipusil sa iyang pasahero sayo kagahapon sa buntag diha sa Barangay Road sa sitio Lantawan, Barangay Candugay lungsod sa Barili. Ang mga residente sa maong lugar nakadungog og usa ka masipang buto sa armas pasado alas-5 sayo kagahapon sa buntag sa wala pa makit-i ang patay’ng lawas daplin sa karsada sa biktimang si Benigno Buhay, 58, nga taga Barangay Poblacion sa naasoy’ng lungsod.
Si Buhay nakaangkon og samad pinusilan sa luyong bahin sa iyang ulo nga maoy nakaingon sa iyang hinanaling kamatayon. Si Sr. Insp. Marlon Gumabao, hepe sa Barili Police Station nagkanayon nga ang kriminal gihulagway nga gamayon ang panglawas niini.
“Naay nakakita nga nay pasahero ang biktima mga alas 4:00a.m. unya kana orasa mingaw pa ra ba,” matud pa ni Gumabao. Matud niya gihatud sa biktima ang suspek ngadto sa barangay Candugay apan pag-abot sa mingaw nga lugar ang suspek mipusil sa luyong bahin sa ulo sa biktima. Gidugang ni Gumabao ang doctor nga mipahigayon sa autopsy sa patay’ng lawas sa biktima nakakuha og usa ka slug sa .9mm kalibreng bala diha sa ulo sa biktima.
Nagtuo ang kapulisan nga posibleng motibo sa kriminal mao ang tulis sanglit wala na silay narekober nga kwarta gikan sa bulsa sa biktima. Wala usab nila gisalikway ang posibilidad nga personal nga atraso ang nagpaluyo nga motibo sa pagpatay sa biktima. (BANAT NEWS)