Negosyante way business permit silotan

CEBU, Philippines - Mipasidaan ang kagamhanan sa dakbayan sa Talisay nga mahiagom sa silot ang mga negosyante sa dakbayan nga nagpadagan og negosyo nga walay business permit.

Kini human masuta ang usa sa mga ihawan sa hayop ug litsonan   sa sitio Kasambagan, barangay Tabunok, sa maong dakbayan nga walay mga business permit.

Si Laureano Suarez , usa ka negosyante    nga nagpuyo   sa maong lugar mireklamo pinaagi sa iyang abogado nga si manlalaban Romeo Balili ngadto kang Kongresista Eduardo Gullas sa unang distrito sa lalawigan sa Sugbo kalabot sa kabaho ug kahugaw sa ilang sitio gumikan niining mga ihawan, litsonan, ug uban pang patigayon nga anaa sa maong lugar. Matud  pa ni Suarez nga adunay mialisngaw nga bio-gas gikan sa hugaw sa baboy, nagpasad ang mga tinabas nga goma sa ligid sa trak, ug mga sobrang pagkaon nga anha lang isalibay sa maong dapit busa gipistahan kanunay sa langaw ug ang kahugaw niini naghatag og hulga sa panglawas sa mga molupyo. Si Suarez kansang tulo ka andanang edipisyo anaa mahimutang sa maong sitio nagkanayon nga di sila makatarong og tulog sa gabii gumikan sa kabaho ug sa adlaw naghitak ang maong dapit sa kahugaw  sa palibot niini.

Namatud-an usab sa mga inspector nga sa maong mga lugar may mga tindahan sa lumber, kawayan, kahoy nga igsu-sugnod, uling, mga prutas, mga goma nga kaang, ug mga pasilonganan sa manok nga hinimo sa goma sa ligid sa trak.

Walay drainage system ug walay labayanan sa basura ang maong dapit nga maoy nakapahugaw sa palibot niini.

Sila si Mayor Socrates Fernandez ug Vice Mayor Alan Bucao kinsa nakadawat usab sa reklamo mipalihok karon sa mga tinugyanan sa City Hall aron sa paghinlo sa maong lugar ug sa paghimo og lakang batok sa mga negosyante nga wala motuman sa balaod bahin sa paglukat og business permit.  - BANAT NEWS