Lalaki gipusil likod nababha

CEBU, Philippines - Nababha ang likod sa usa ka lalaki human kini pusila sa gituohang nagbantay sa usa ka construction site sa barangay Tabunok, dakbayan sa Talisay kagahapon sa kaadlawon.

Ang biktima mao   si Alejandro Tapinid alyas”Andoy, hingkod, nga taga sitio Colis, barangay Tabunok, sa maong dakbayan.

Samtang ang suspetsado mao usab si Juvy Ibañez, 23, lumad nga taga lungsod sa Asturias apan temporaryong nag-estar sa Je Ann Square nga usa ka construction site sa Tabunok kinsa gituohang maoy gipabantay sa maong lugar.

Si PO3 Juanito Makabenta sa Talisay City Police Station mibutyag nga sa imbestigasyon nila ni Inspector Hugo Rio Ipong, PO2 Roy Lofranco ug PO1 Euwen Pitogo nasuta nga sa wala pa mahitabo ang pagpamusil, si Tapinid giingong misulod sa construction site nga walay pananghid hinungdan nga gipusil kini sa suspetsado.

Pipila ka takna human   makapusil, gisikop sa kapolisan ang suspetsado kagahapon sa alas 3:10 sa kaadlawon.

Dihang giimbestigar nila ni Ipong, ang suspek miangkon nga siyay nagluthang sa suspetsado.

 Apan kagahapon sa hapon   dihang gipangutana kini sa jailer nga si PO1 Michael Vincent Balicoco mihimakak na kini sa pasangil batok kaniya ug mibutyag nga dili siya gwardiya sa nahisgutang construction site.

Samtang ang biktima gibalhin ngadto s a Vicente Sotto Memorial Medical Center sa dakbayan sa Sugbo gikan sa Talisay City District Hospital.  - BANAT NEWS