Tinun-an patamno'g utanon

CEBU, Philippines - Ang kagamhanan sa dakbayan sa Sugbo milusad og kampanya sa mga tulunghaan sa kagamhanan bahin sa pagpalambo sa agrikultura.

Sumala ni City Agriculturist Joey Baclayon nga subsob nilang gitudloan ang mga tinun-an sa tukmang pag-atiman sa mga tanom ilabi na sa mga utanon.

Nagkanayon si Baclayon nga makadugang sa kalamboan sa agrikultura sa siyudad kung adunay dakong partisipasyon ang komunidad.

Matud pa niya nga dako usab kaayo og papel niini ang mga batan-on   kung magtuon sila sa basic nga pagpananom.

Kun makakat-on ang tanan makabaton og higayong makadaginot sa mga gasto alang sa pagkaon-ilabi na sa utanon.

Nakig-alayon si Baclayon sa Department of Education alang sa ilang programa ilabi na nga kasagaran sa mga eskuwelahan ning siyudad adunay garden.

Matud pa niya nga nagkatiguwang na usab karong panahona ang mga mag-uuma busa mas maayo nga adunay mga batan-on nga makaantigo nga mananom aron motudlo sa umaabot pang mga   henerasyon.

Ang Cebu City Agriculture Department mipasiugda usab og nagkadaiyang mga training sa mga kabarangayan alang sa hustong paagi sa pag-atiman sa mga tanom.  - BANAT NEWS