Trabahante gipusil sa tiil takingking

CEBU, Philippines - Nagtakingking nga nagdagan ug nagpakitabang ang usa ka construction worker nga gipusil sa kauban niya sa trabaho didto sa sitio San Roque, sa barangay Jubay sa lungsod sa Liloan sa miaging gabii.

Ang biktima mao si Roly Pamaybay Rosales, 38, ulitawo nga lumad nga taga barangay Lusong sa lungsod sa Tuburan ug nagtrabaho sa usa ka construction firm sa maong lugar.

Samtang ang suspetsadong miluthang kaniya mao si Raul Torreon, alyas Pipo, hingkod , nga kauban sa biktima.

Si PO3 Renato Pendo sa kapolisan sa maong lungsod nga nahinabi sa Banat News miingon nga daan na nga nagkalalis ang biktima ug ang suspetsado sa miaging adlaw bahin sa ilang trabaho.

Matud pa ni PO4 Pendo nga gihusay na sa tagdumala sa ilang trabahoan ang duha apan nagdumot diay niini ang suspetsado kay pagkasunod adlaw dihang nasigpatan sa suspetsado ang biktima nga kuyog sa usa ka Dennis Gallego nga laing kauban nila sa trabaho, kalit kining gipusil sa tiil.

Human sa maong pagpusil ang suspetsado dali kaayong nakasibat pahilayo sa maong dapit samtang ang biktima dali usab nga gidala ngadto sa Vicente Sotto Memorial Medical Center sa dakbayan sa Sugbo.

Padayon pang gipangita sa kapolisan ang suspetsado.  - BANAT NEWS