CEBU, Philippines - Patay ang usa sa tulo ka mga batan-on kinsa gipamusil sa “drive-by-shooting “ nga mga criminal nga wala hiilhi kinsa nagsakay og awto sa managlahing lugar ug oras ning dakbayan sa Sugbo kagahapon sa kaadlawon.
Ang namatay mao si Anthony Gabunada, 14, taga Banawa, samtang sila si Rex Gomera, 14; nga taga Guadalupe, ug Mark Joel Doble, 19, nga taga Carreta, anaa sa talandugong kahimtang sa tambalanan. Si PO2 Esmer Escultor sa homicide section sa Cebu City Police Office, mibutyag sa Banat News nga ang unang gipusil sa alas 12:00 sa tungang gabii kagahapon mao si Gomera kinsa nagpaabot ug jeep sa dalan Ramon Duterte, sa barangay Guadalupe paingon sa ilang balay. Matud ni Escultor nga usa ka kolor gray nga awtong Sedan kalit nga mimenor dihang nahiduol kini kang Gomera ug dayon giluthang sa dughan ang biktima.
Human maigo si Gomera daling mibiya ang maong sakyanan paatubang sa Banawa. Pag-abot didto sa Banawa nasigpatan usab sa criminal nga nagsakay sa maong kotse si Gabunada nga nakig-inom sa iyang barkada ug kini na usab ang giluthang.
Ang biktima kinsa wala na makatago tungod sa kakalit sa hitabo nasabak ang bala sa iyang ilok nga milapos sa dughan.
Nianang pagka-alas 3:00 sa kaadlawon si Doble kinsa naglingkod-lingkod sa daplin sa karsada sa barangay Carreta uban sa iyang mga barkada mao na usay gipusil sa mga criminal nga nagsakay gihapon sa maong gray nga Sedan.
Nasabak si Doble sa liog ug lobot, apan walay naigo sa iyang mga kauban kay dali kaayo kining nakadagan ug nakatago. Si Escultor nagkanayon nga susihon pa nila kun dili ba mga sakop og gang ang mga biktima.
Ang kapolisan padayon usab nga nagsubay sa ngalan sa mga criminal ilabi na ang sakyanan nga gigamit niini ug ang motibo sa maong pagpamusil.
Ang tulo ka biktima gipanghatod dayon ngadto sa Cebu City Medical Center, apan si Gabunada ray nakabsan sa kinabuhi pipila ka oras human kini ikahatod sa maong tambalanan. - BANAT NEWS