CEBU, Philippines - Gawas sa jail warden ug sa luyo-luyo niini nga gitangtang sa katungdanan, gilakip usab ni Gobernador Gwendolyn Garcia pagpapha ang Capitol Consultant on jail matter.
Matud pa ni Gobernador Garcia nga panahon na karon aron nga masinatian sa mga kawani sa Kapitolyo ang iyang kapintok mopakanaog og desisyon batok niadtong magpabaya sa ilang katungdanan.
Si Ret. Police Cesar Veloso, wa makaikyas sa lakang sa gobernador pagpitol sa mga badlungon nga mga kawani sa prisohan pinaagi sa pagpalagpot usab kaniya.
Sayo niini gitangtang sa gobernador sila si Algier Comendador, jail warden sa Cebu Provincial Detention and Rehabilitation Center (CPDRC) ug ang iyang assistant warden nga si Renaldo Pepito Jr.
Kini human makaeskapo ang usa ka piniriso nga mitambong sa hearing sa iyang kaso.
Matud pa sa gobernador nga si Veloso karon iya nalang gihimo nga consultant sa Peace and Order sa Kapitolyo
Ang gihulip kang Veloso mao si manlalaban Jose Maria Gastardo, kinsa maoy consultant sa Urban Development sa Kapitolyo.
Si Gastardo maoy mopatumang hugot sa mga lagda sa CPDRC ilabina na ang bahin sa higpit nga pagbantay sa mga piniriso nga motambong sa hearing sa ilang mga kaso.
Kini tungod kay mao kana ang higayon nga kasagarang makaeskapo ang piniriso kay anaa na sila sa gawas sa prisohan ug kun magdanghag ang guwardiya sigurado nga makaipsot kini.
Karong si Gastardo na ang mangulo sa CPDRC gipaabot nga may mga kausaban sa mga sistema sa sulod sa prisohan sa lalawigan
Usa niini mao ang pagpaubos sa tanang mga jail guard sa usa ka reorientation seminar aron makasabot sila sa kamahinungdanon sa ilang tagsatagsa ka kaakohan sa pagbantay sa mga binilanggo. (BANATNEWS)