86 anyos naghikog sa sanga sa Cacao

CEBU, Philippines - Patay nang nakit-an sa anak ang 86 anyos niyang amahan nga nagbitay sa punoan sa kahoy gawas sa ilang balay didto sa Sitio Laguna, barangay Guadalupe, siyudad sa Carcar niadtong Biyernes sa alas 6:00 sa buntag.

Ang nagpakamatay mao si Valentin Eliorda, 86, biyudo .

Si PO2 Rosendo Benondo sa Carcar City Police mibutyag sa Banat News  nga ang anak niini nga si Jocelyn maoy nakadiskobri sa patay’ng lawas sa iyang amahan.

Si Jocelyn mitug-an sa kapolisan nga pagbangon sa buntag nangabli dayon siya sa ilang bintana dihang maoy misugat sa iyang panan-aw ang iyang amahan nga nagbitay na sa sanga sa Cacao sa likod sa ilang balay.

Nasuta sa anak nga gihiktan og pisi ang liog sa iyang amahan kansang tumoy niini didto igaid sa sanga sa Cacao.

Matud pa ni Jocelyn nga sa milabay’ng adlaw mihangyo kini kaniya nga magpa-check-up sa doktor   ug mangompisal sa pari. Kombinsido ang kabanay sa biktima nga walay foul play ang kamatayon niini busa wala nalang nila ipa-autopsy ang iyang patay’ng lawas. (BANATNEWS)