Batan-on nalumos sa lim-aw

CEBU, Philippines - Patay ang 13 anyos nga lalaki human kini malumos sa lim-aw duol sa quarrysite sa Sitio Kalubihan, barangay Ilihan siyudad sa Toledo niadtong Biyernes sa alas 2:00 sa hapon.

Ang biktima mao si Mark Queen Hantica,13 nga taga Sitio Sambag barangay Magdugo, dakbayan sa Toledo.

Si SPO4 Gil Lastimosa, desk officer sa Toledo City Police Station mibutyag sa Banat News nga ang biktima kauban sa iyang manghod nga lalaki nga si Marlon ug lain pang duha ka bayong-bayong nangaligo sa dakung lim-aw daplin sa sapa duol sa usa ka quarrysite nga gipanag-iya sa Obeso Sand and Gravel.

Matud ni SPO4 Lastimosa nga samtang nalingaw ang biktima sa pagsawom-sawom sa lim-aw nga kinawotan sa quarrysite , kalit lang kining nahubsan   og ginhawa    busa milugdang kini ngadto sa ilawom sa tubig.

Si Tukyog Sombelon kinsa nakamatngon nga nahanaw na ang biktima midagan ngadto sa lim-aw ug misawom sa ilawom sa tubig nga adunay igo igo nga giladmon. Didto gisakwat niini ang biktima nga wala nay panimuot ug gihatud dayon ngadto sa Toledo City District Hospital diin didto kini ideklarar   sa mga doctor nga dead on arrival (DOA).

Ang kapolisan padayon pang miimbistigar sa maong hitabo ug apil nga gitun-an kun wala bay tulobagon ang nagpahigayon og quarry operation sa maong lugar.

Pipila ka mga molupyo sa maong lugar mireklamo nga gumikan sa kinubkobay sa yuta sa ilang dapit puwerti nang gusbata sa   ilang karsada. (BANATNEWS)