DepEd milusad peso-pesong tampo

CEBU, Philippines - Ang mga magtutudlo ug mga tinun-an dinhi sa Sugbo ug ubang bahin sa Central Visayas boluntaryong nagtampo-tampo og peso-peso aron ihinabang sa mga tinun-an ug magtutudlo didto sa Negros Oriental nga nabiktima sa linog.

Si DepEd 7 Asst. Regional Director Carmelita Dolangon mibutyag sa Banat News nga bisan walay opisyal nga mando gikan sa ilang ulohang buhatan sa Manila, apan boluntaryo nila kining gibuhat aron mahimong giya sa mga kabataan ang kamahinungdanon sa espiritu sa pagtinabangay sa panahon sa mga katalagman.

Matud pa ni Dolangon nga di ikaasoy sa baba ang kaalaot nga nahiagoman sa mga tinun-an ug mga magtutudlo nga nasugamak sa linog niadtong Lunes dihang midahili ang yuta ug mitabon sa ilang   mga pinuy-anan.

Apan ang labaw’ng sakit, matud pa niya mao kadtong mga magtutudlo ug mga tinun-an kansang mga kabanay nalubong buhi sa yuta nga mitabon sa ilang mga balay.

Matud pa ni Dolangon nga bisan tuod og peso-peso lang apan   kinasing-kasing tampo sa mga bata ug mga magtutudlo, kun matigom kini ikatampo na kini sa   mga panginahanglan niadtong nahiagom sa katalagman.

Sa pagkakaron aduna nay mga division superintendent nga mipahibawo kanila nga nakahipos na og mga ginagmay’ng ayuda gikan sa mga tinun-an ug ginikanan ingon man mga magtutudlo nga misalmot sa maong tampo-tampo.

Midugang si Dolangon nga ilang gilusad kining maong kampanya human nila makita pinaagi sa sibya ug balita sa telebisyon nga naglisud karon sa pagkaon ug tubig nga mainom ang mga biktima sa linog didto sa Negros Oriental. (BANATNEWS)