Mga eskuylahan gisusi human sa linog

CEBU, Philippines - Si Cebu Cty Department of Education Supt. Ria Mar Angtod maoy nangunay sa pag-monitor sa mga publikong tunghaan sa dakbayan sa Sugbo sayo sa miaging buntag aron pagsusi kun nakabalik na ba sa normal ang klase sa elementarya ug sekondarya dinhi sa dakbayan.

Gibutyag sa staff sa DepEd sa Cebu City Dep-Ed sa Banat News nga nagdumili lang pagpapublikar sa iyang ngalan si Dr. Angtod kinsa mikuyog sa mga DepEd Engineer nga misusi sa mga school buildings sa mga bukirang barangay aron pagsuta kun luwas ba kini nga pahigayonan og klase sa mga tinun-an.

Hinuon mikabat na sa 80 ngadto sa 90 porsyento sa mga school building ang nasusi nila ug halos tanang mga tunghaan nakabalik na sa normal ang klase. Apan ang Guadalupe Elementary School ug ang Ramon Duterte National High School pabilin gihapong wala magpahigayon og klase niadtong Huwebes kay walay mga mitunga nga mga tinun-an, sumala ni Carlito Quijano, usa ka Industrial teacher sa Guadalupe Elementary School.

Dugang pa ni Quijano nga adunay mga section nga ang mitunga duha, tulo ug lima lang ka bata hinungdan nga wala nalang kini klasehe sa mga magtutudlo.

Si Quijano nanawagan sa mga ginikanan pagpatungha sa ilang mga anak tungod kay normal na ang klase ug human na ang pag-inspeksyon sa mga school building. (BANATNEWS)