Radio blocktimer gikasohan tungod sa 'tsunami scare'

CEBU, Philippines - Gipasakaan og kaso kagahapong adlawa og kasong kalapasaan sa Republic Act 153 o Alarm Scandal ang blocktimer sa radyo nga si Danilo Cogtas human kini gitumbok sa mga saksi nga maoy mipakatap sa estoryang dunay ‘tsunami’ nga nakamugna og kagubot ug kahadlok sa publiko.

Base sa joint affidavit sa duha ka saksi nga silang Roldan Espina ug Ryan Pedrosa, nga mga drayber sa habal-habal sa barangay Lahug pipila ka minutos ang milabay human sa linog ilang nasayran gikan mga awtoridad nga adunay tsunami alert. Apan bisan paman sa ilang kabalaka padayon gihapon sila nga namasahero, apan gikatingala nila ang kagubot sa mga tawo nga nagdinaganay padulong sa bukid ug tungod sa ilang kakuryoso miadto sila sa barangay Pasil aron susihon ang dagat. Ang duha nangangkon nga ilang naagian ang usa ka lalaking sakay sa usa ka motorsiklo ug nagsiyagit sa mga tawo nga adunay tsunami nga moabot.

“Before we can continue driving towards the coastline we happened to pass by a man on-board a motorcycle shouting loudly towards people that a tsunami was coming. He was wearing a big ID of some sort prominently around his neck. He was also wearing a dark sleeveless vest like the ones worn by media peole,” tipik sa joint affidavit sa duha. Tungod sa panamit sa maong tawo nagtuo silang usa kini ka opisyal hinungdan nga dali silang mibalik sa ilang agi aron luwason ang kaugalingon.

Sa diha nga migawas ang report nga ang kapolisan sa Cebu City Police Office mipatawag sa duha ka tawo nga maoy responsable sa false alarm nga tsunami scare ug migawas ang hulagway ni Cogtas sa mga balita silang duha daling miadto sa kapolisan aron mohatag sa ilang pamahayag.

“When we bought a tabloid, we immediately saw the picture of the same man we saw in Pasil wearing the dark sleeveless vest and big ID around his neck shouting the Tsunami was coming. When we read further, we learned that his name is Danilo Cogtas and he was invited by the Cebu City Police to explain,” tipik sa affidavit.

Aduna pay ikatulong testigo ang kapolisan nga usa ka sakop gihapon sa media kinsa giingong nakadungog gyud sa pangangkon ni Cogtas kabahin sa iyang gihimong pagpakatap sa false alarm nianang adlawa.

Matud pa nga nasagmuyo og maayo ang maong sakop sa media tungod kay hasta iyang mga ginikanan nahasol tungod sa kalisang sa maong balita.

Samtang ang hepe sa City Intelligence Branch Supt. Romeo Santander mipasabot sa Banat News nga wala pa nila mapasaka ang kaso batok ni Barangay Ermita councilor Dominggo Ando Jr. tungod kay nagpaabot pa sila sa witness nga moluwat og pamahayag.

Ang duha kusganong mihimakak sa pasangil, si Cogtas nangangkong siya susama ra sa uban nga nabiktima sa false alarm sanglit nagkapuliki sad sila sa pagsalbar sa ilang mga pamilya ug sa konstituwente sa barangay.

Giklaro usab ni Santander nga wala sila mamersonal sa mga gitumbok nga responsable ug igo lang sila nga misunod sa ilang trabaho.  (BANATNEWS)