CEBU, Philippines - Temporaryong gipahulipan ni Gov. Gwendolyn Garcia ang jailwarden sa Cebu Provincial Detention and Rehabilitation Center nunot sa migawas nga report nga usa sa iyang jailguard nga gitahasang mobantay sa usa sa mga bilanggo nakit-ang nakigpaniudto uban sa maong bilanggo ug sa abogado niini.
Si Jail Warden Aljer Comendador gipatawag sa buhatan ni Garcia kalabot sa migawas nga report tungod kay giingong nasagmuyo ang gobernador tungod kay naeskapohan na og bilanggo si Comendador dili palang dugay tungod gihapon sa pagpabaya sa jailguard escort.
Buot ni Garcia nga ipaubos sa imbestigasyon si Comendador ug ang assistant jailwarden nga Reynaldo Pepito. Ang duha hulipan nila ni Security Agent 2 Napoleon Miranda ug Romeo Mansala.
Ang jailguard kansang pangalan wala pa mailhi maoy nag-escort sa kanhi mayor sa Lezo, Caticlan sa Aklan nga si Alfredo Arcenio kinsa suspek sa pagpatay sa brodkaster sa Bombo Radyo nga si Herson Hinolan nga ang kaso gihusay niadtong milabay’ng adlaw diha sa Palasyo sa Hustisya.
Apan sumala pa sa report, giingong nasigpatan si Arcenio, ang jailguard ug abogado niining si Eduardo Arriba nga naniudto sa usa ka restaurant diha sa barangay Capitol Site dili layo sa hukmanan.
Matud pa ni State Prosecutor Llena Ipong-Avila, ang pangulo sa DOJ-Witness Protection Program (WPP), ang Department of Justice (DOJ) state prosecutor Hazel Valdez mopasaka og contempt batok sa tulo tungod sa maong report.
Midugang si Avila nga ang abogado ni Arcenio nga si Eduardo Arriba maampingon unta kini tungod kay nasayod man siya kun unsay balaod.
Gipadayag usab ni Avila nga siya maoy naluoy sa jail guard nga mi-escort ni Arcenio niadtong tungura. “The only price in possession of the guard was his job, he should be careful, the lawyer should be prudent enough,” pasabot pa ni Avila .
Mipasabot usab si Avila nga bisan paman og gusto nimong ihatag ang tanang serbisyo aron makontento ang ilang kliyente apan angayan usab nga ibutang kini sa saktong lugar.
“ He can visit his client all the time in jail and at the same time he can bring him food,” matud pa ni Avila kinsa miingon nga dako ang kahigayunang makaeskapo si Arcenio tungod niini. (BANATNEWS)