Rama mopa-imbestigar sa DPS

CEBU, Philippines - Andam si Mayor Michael Rama nga motukod og laing grupo nga maoy moimbistigar sa isyu bahin sa overpricing sa mga gipamalit nga mga piyesa sa sakyanan ug uban pang transaksyon nga giatubang karon sa Department of Public Services (DPS) .

Bisan kun giimbistigar na kini ni Engr. Dionesio Gualiza, hepe sa DPS, apan matud pa ni Rama nga mas maayo nga laing grupo ang moimbistigar  niini aron makaingon ang publiko nga patas ang maong imbestigasyon.

Nagkanayon si Rama nga pipila sa departamento nga mahimong moimbistigar mao ang Human Resources Development Office (HRDO), City Legal Office ug uban pa.

Giklaro hinuon sa mayor nga wala pa’y tataw kung unsang departamentoha ang tahasan sa pag-imbistigar sanglit mohimo pa siya og konsultasyon labot niini.

Samtang sa sayo niini gipadayag ni Gualiza nga wala siya masayod sa maong mga pasangil apan mokooperar siya sa gihimong pakisusi karon aron matin-aw ang tanan.

Gipadayag hinuon niya   nga kung adunay tawo niya nga mapamatud-ang nakahimo sa maong anomaliya dili siya magpanuko sa pagsang-at og kaso niini.

Sayo niini gibutyag ni Konsehal Richard Osmeña nga iyang naobserbahan nga adunay mga anomaliya sa pagpalit og pipila ka spare parts sa mga sakyanan .

Si Osmeña mihimo og pasiunang imbestigasyon niini hinungdan nga nakakuha siya og pasiunang resulta diin iyang nasuta nga aduna gyuy nahitabong overpricing o pagpalapaw sa prisyo sa mga materyales nga kinompra sa DPS.

May mga dokumentong nahipos si Osmeña nga sarang mopamatuod niini. (/WC)  (BANATNEWS)