2 gikwestiyon sa tsunami scare mi-deny

CEBU, Philippines - Hugtanong gihimakak sa usa ka kagawad ug sa usa ka radio blocktimer nga sila maoy nagpakatap sa ‘tsunami scare’ human sa linog niadtong Lunes dinhi sa Sugbu ug ubang bahin sa Central Visayas nga nakamugna og panic sa katawhan.

Si Danilo ‘Danny’ Cogtas, 39, taga Talisay ug radio blocktimer sa sibyaanang DyRB sa dakbayan misaysay nga human sa linog niadtong Lunes, didto siya sa iyang opisina sa Tabang Sugbu Operation nga nahimutang sa sitio Kalmar sa barangay Lawaan Uno.

Matud pa niini atol sa kaguliyang sa mga tawo susama ra siya og reaksyon sa ubang mga amahan nga mao ang pagpangita sa iyang mga anak aron sila masigurong luwas.

Sumala pa niya nga iyang gitawgan sa cellphone ang iyang anak nga papangitaon og taas nga lugar tungod kay giingong adunay moabot nga tsunami.

“Dong gawas diha sa office ug pangita’g bukid, katulo nako kontaka akong anak kay dili kaayo ko kadungog tungod sa kasaba na sa mga tawo,” matud pa ni Cogtas sa iyang gisulti sa iyang anak diha sa cellphone.

Matud ni Cogtas diha siya sa Pasil dihang iyang gitawgan ang 22-anyos niyang anak samtang nagpaabot siya sa iyang sekretarya nga si Grace Giada kinsa nagkuha sa mga anak niini. Human niadto gikatahong mipasirit sila padulong sa bukid sa Guadalupe tungod sa kahadlok ug subling gitawgan ang anak nga niadtong tungura naa ra magpundo sa ilang buhatan sa Tabang Sugbu Operation sa Lawaan Uno.

Didto niya mahibaw-ing bakak ang mikatap nga ‘tsunami scare’ dihang gipahibalo siya sa iyang anak nga walay kausaban sa dagat nga nahitabo, human niadto mi-report siya sa ilang sibyaanan sanglit oras na sa iyang programa.

“Wala koy gihisgutan sa akong programa og tsunami, ang ako rang gihisgutan nga ang tawo diay dili pa andam sa mga katalagman,” pasabot pang Cogtas.

Matud ni Cogtas nga mianha gyud siya sa Investigation and Detective Management Branch (IDMB) ug City Intelligence Branch (CIB) kagahapon sa buntag aron malimpyohan ang iyang pangalan ug gusto niyang sutaon si kinsa ang mitumbok kaniya nga maoy nagrekoreda sa ‘tsunami scare.’

Sumala pa ni Cogtas usa siya sa mga nabiktima isip usa ka amahan nga mibati og kahadlok tungod sa maong sayop diay nga tabitabi maong gitawagan niya ang iyang anak.

Samtang sa iyang bahin, si kagawad Domingo ‘Jun’ Ando Jr. sa barangay Ermita kinsa usa sa giimbitar sa IDMB ug CIB mitug-an nga human sa linog igo ra siyang misusi sa mga ginikanan kun namauli na ang mga anak niini gikan sa mga tunghaan human gikanselar ang klase.

Matud niya nga misusi pa siya sa dagat human sa linog ug pagbalik niya uban sa mga tanod didto na sila sa barangay hall nga gidangpan sa mga tawo nga nag-panic ug ilaha silang gitambagan nga dili maratol.

“Ngano gud tawong moingon ta anang tsunami nga usa gud ko ka opisyal sa barangay, ang ako lang nga concern ko sa akong mga konstituwente,” matud pang Ando.

Apan si Chief Insp. Romeo Santander, hepe sa CIB nga nahinabi sa mga tigbalita nagkanayon nga tulo ka mga saksi nga nagtumbok nila ni Ando ug Cogtas nga maoy sinugdanan sa ‘tsunami scare.’

Gani matud pa ni Santander ilaha gyud ipadayon ang pagpasaka og kaso batok nilang Cogtas ug Ando ug gipaabot nalang nila si Sr. Supt. Melvin Ramon Buenafe aron ilang tukion ang tukmang kaso nga ipasaka nila ni Cogtas ug Ando. Mipasabot si Santander igo lang sila mituman sa ilang trabaho ug wala kini personalan kay numero uno wala siya makaila nilang Ando ug Cogtas.

Kung makasohan ang duha posibleng mag-atubang sila og kasong kalapasan sa Article 153 sa Revised Penal Code.(/EIM) (BANATNEWS)