Negosyante gibabha og shotgun patay

CEBU, Philippines - Nababha ang walang bahin sa abaga sa usa ka 34-anyos nga lalaki human kini gipusil gamit ang shotgun samtang nagsusi sa iyang mga binuhing baboy sa sitio Baktas sa barangay Mag-atubang lungsod sa Tuburan niadtong miaging alas 8:30 sa gabii.

Ang biktima nga patay diha-diha mao si Gregorio Denega Jr., 34, nagpuyo sa maong lugar ug nagnegosyo sa pagpamuhi og mga hayopan sama sa baboy.     

Matud ni PO1 Eric Diamante sa Tuburan Police dihang nahinabi sa Banat News ang asawa sa biktima mitug-an sa mga imbestigador nga migawas ang biktima sa ilang balay tungod sa nadungog nga kasikas ug saba kaayo ang ilang baboy diha sa tangkal gibanabanang 50 metros gikan sa ilang balay.

Ang biktima nga nagdala og flashlight ug misusi sa gawas apan kinse metros sa dili pa ang tangkal sa baboy kalit kining gipusil sa wala mailhing tawo sa tuong abaga.

Matud sa asawa sa biktima kinsa nagtan-aw sa bana diha sa bintana nakakita pa siya sa pagsiga sa sumbohan sa armas pagbuto niini apan wala niya maklaro ang nawong sa mamumuno tungod sa kangitngit.

Bisan og samaron midagan ang iyang bana balik sa balay nga nagpakitabang apan nahagba kini sa yuta ug sa iyang kahadlok midagan usab siya paingon sa ilang mga silingan.

Patay na ang biktima sa ilang pagbalik ug wala na diha ang mamumuno.

Ang kapulisan padayun pang nagsusi sa motibo sa maong pagpatay. Giingong miasenso ang pamilya sa biktima pinaagi sa pagpamuhi og baboy ug nakaangkon og mga yuta pinaagi niini apan walay nahinumdumang nakakita og kaaway ang biktima sumala pa sa asawa niini sa kapolisan. (BANAT NEWS)