Kongreso sa US pabor palig-unon ang relasyong Phl-US

CEBU, Philippines - Pabor ang mga magbabalaod sa Estados Unidos sa tinguha sa administrasyon ni Obama nga palig-unon pa og maayo ang relasyon sa ilang nasud ug sa Pilipinas ug mipahibalo ang ilang Kongreso mopadali sa pagbalhin sa ilang ikaduhang barkong panggubat ngadto sa Philippine Navy aron makatabang sa pagpanalipod sa kadagatan niini.

Si Republican Rep. Ed Royce sa usa ka House of Representatives Foreign Affairs bahin sa U.S.-Philippine relations nagkanayon nga ang congressional review process sa pagbalhin sa Coast Guard Cutter Dallas mahuman na karong        semanaha.

Ang maong barko gipaabot nga maglayag na padulong sa Pilipinas sa mosunod nga mga adlaw.Kini maoy ikaduhang Hamilton Class nga barkong nadawat sa Pilipinas gikan sa US sukad sa milabay’ng tuig.

Buot sa U.S. nga makasustinir ang Pilipinas nga mamentinar ang seguridad sa kadagatan niini tungod sa kabalaka sa Pilipinas sa agresibong mga lihok sa silingang nasud nga China diha sa West Philippine Sea.

Bisan walay giangkong teritoryo ang US sa maong rehiyon si U.S. diplomat for East Asia, Kurt Campbell, mipadayag nga ang national interest sa US kinahanglang sa malinawong paagi maresolbar ang kasungian ug ipabilin ang gawasnong pag-agi sa mga barko sa maong lugar.

Dugang pa ni Campbell nga gitun-an karon sa US ang makiangayong hangyo sa Pilipinas nga ibalik ang mga modernong ekipo nga gipangtangtang sa unang Hamilton.

Sumala pa sa report ang unang Hamilton class nga barkong miabot sa Pilipinas gitangtangan og sensors, communications ug electronics equipment ug close-in weapons system nga gamit kaayo aron mabantayan ug matirahan bisan unsang anti-ship missile o ba kaha eroplano nga buot moatake niini.

Kabahin sa hangyo sa Pilipinas nga mga F-16 fighter jets siActing Assistant Secretary of Defense Peter Lavoy miingon   nga ilang gitun-an ang mga hangyo sa Pilipinas nga gibase sa "affordability and sustainability" sa maong nasud. AP/EIM (BANAT NEWS)