ERUF molarga sa Negros Occidental

CEBU, Philippines - Gipahibalo ni Mayor Michael Rama kagahapon nga magpadala og representante ang siyudad sa Sugbo ngadto sa Negros Occidental aron motabang sa nagpadayong search and rescue and retrieval operations human sa 6.9 magnitude nga linog niadtong Lunes.

Matud pa sa mayor nga dunay mga paramedics nga gikan sa Emergency Rescue Unit Foundation Inc. (Eruf) ang molarga na sa maong lugar sulod niining semanaha dala ang 300 ka bag nga dextrose alang sa mga nangaangol sa linog.

Mohimo usab ang maong grupo og assessment aron masuta kung unsa pang mga butang ang mahimong matabang sa siyudad.

Gipasugdan na usab karon ni Rama ang pag-proseso sa P5 milyones nga hinabang alang sa mga dapit nga naapektohan sa linog.

Si Rama kinsa chairman usab sa Regional Development Council-7 mipadala usab og suwat ngadto sa ubang mga leader sa ubang local government unit nga mohatag og tabang sa Negros Occidental.

Gawas sa grupo sa paramedics ug financial assistance, ang mayor nagplano usab nga magpadala og tubig nga maoy usa sa labing gikinahanglan pag-ayo sa mga survivors sa linog.

Nasayran nga ang mga lumulopyo sa Negros Occidental didto na lang nangatulog sa mga kadalanan gumikan kay dili kini andam mobalik sa ilang panimalay gumikan sa kahadlok nga mobalik pa ang linog.  - BANAT NEWS